ਚੰਡੀਗੜ੍ਹ, 31 ਮਈ - ਹਰਿਆਣਾ ਸੈਰ-ਸਪਾਟਾ ਨਿਗਮ ਵੱਲੋਂ ‘ਆਓ ਚੱਲੀਏ ਆਪਣੀ ਵਿਰਾਸਤ ਦੇ ਨਾਲ’ ਮੁਹਿੰਮ ਤਹਿਤ ਬੀਤੀ 30 ਮਈ ਨੂੰ ਸੂਬੇ ਦੇ ਸੱਤ ਪ੍ਰਮੁੱਖ ਵਿਰਾਸਤੀ ਸਥਾਨਾਂ ’ਤੇ ‘ਹੈਰੀਟੇਜ ਐਂਡ ਸਿਟੀ ਵਾਕ 2026’ ਦਾ ਸਫਲ ਆਯੋਜਨ ਕੀਤਾ ਗਿਆ। ਇਸ ਪਹਿਲਕਦਮੀ ਦਾ ਉਦੇਸ਼ ਨਵੀਂ ਪੀੜ੍ਹੀ ਅਤੇ ਆਧੁਨਿਕ ਸਮਾਜ ਨੂੰ ਹਰਿਆਣਾ ਦੀ ਅਮੀਰ ਸੱਭਿਆਚਾਰਕ, ਇਤਿਹਾਸਕ ਅਤੇ ਆਰਕੀਟੈਕਚਰਲ ਵਿਰਾਸਤ ਨਾਲ ਜੋੜਨਾ ਸੀ।

ਇਸ ਵਿਸ਼ੇਸ਼ ਆਯੋਜਨ ਰਾਹੀਂ ਭਾਗੀਦਾਰਾਂ ਨੂੰ ਉਨ੍ਹਾਂ ਇਤਿਹਾਸਕ ਸਥਾਨਾਂ, ਪਰੰਪਰਾਵਾਂ, ਸਮਾਰਕਾਂ ਅਤੇ ਵਿਰਾਸਤਾਂ ਨੂੰ ਨੇੜਿਓਂ ਜਾਣਨ ਅਤੇ ਸਮਝਣ ਦਾ ਮੌਕਾ ਮਿਲਿਆ, ਜੋ ਹਰਿਆਣਾ ਦੀ ਪਛਾਣ ਦਾ ਅਨਿੱਖੜਵਾਂ ਅੰਗ ਹਨ। ਮਾਹਿਰਾਂ ਦੀ ਅਗਵਾਈ ਵਿੱਚ ਆਯੋਜਿਤ ਇਨ੍ਹਾਂ ਵਾਕਸ ਦੌਰਾਨ ਭਾਗੀਦਾਰਾਂ ਨੇ ਵੱਖ-ਵੱਖ ਸਥਾਨਾਂ ਦੇ ਇਤਿਹਾਸ, ਮਹੱਤਵ ਅਤੇ ਉਨ੍ਹਾਂ ਨਾਲ ਜੁੜੀਆਂ ਦਿਲਚਸਪ ਕਹਾਣੀਆਂ ਬਾਰੇ ਜਾਣਕਾਰੀ ਪ੍ਰਾਪਤ ਕੀਤੀ।

ਹਰਿਆਣਾ ਦੇ ਵਿਰਾਸਤ ਅਤੇ ਸੈਰ-ਸਪਾਟਾ ਮੰਤਰੀ ਡਾ. ਅਰਵਿੰਦ ਸ਼ਰਮਾ ਰਾਈ, ਸੋਨੀਪਤ ਵਿੱਚ ‘ਐਥਨਿਕ ਇੰਡੀਆ ਰਾਈ’ ਤੋਂ ‘ਬੜਖਾਲਸਾ ਸਮਾਰਕ’ ਤੱਕ ਆਯੋਜਿਤ ਹੈਰੀਟੇਜ ਵਾਕ ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਇਸ ਮੌਕੇ ਉਨ੍ਹਾਂ ਨੇ ਭਾਗੀਦਾਰਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਸਾਡੀਆਂ ਸੱਭਿਆਚਾਰਕ ਅਤੇ ਇਤਿਹਾਸਕ ਵਿਰਾਸਤਾਂ ਦੀ ਸੰਭਾਲ ਅਤੇ ਪ੍ਰਫੁੱਲਤਾ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਅਜਿਹੇ ਆਯੋਜਨ ਨੌਜਵਾਨਾਂ ਵਿੱਚ ਆਪਣੀ ਸੰਸਕ੍ਰਿਤੀ ਅਤੇ ਇਤਿਹਾਸ ਪ੍ਰਤੀ ਜਾਗਰੂਕਤਾ ਵਧਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ।

ਹਰਿਆਣਾ ਸੈਰ-ਸਪਾਟਾ ਨਿਗਮ ਦੇ ਬੁਲਾਰੇ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਨਿਗਮ ਵੱਲੋਂ ਹੈਰੀਟੇਜ ਐਂਡ ਸਿਟੀ ਵਾਕ ਦਾ ਆਯੋਜਨ ਸੂਰਜਕੁੰਡ, ਫਰੀਦਾਬਾਦ, ਰੇਵਾੜੀ (ਸੈਂਡਪਾਈਪਰ ਟੂਰਿਸਟ ਕੰਪਲੈਕਸ ਤੋਂ ਵੱਡਾ ਤਾਲਾਬ ਤੱਕ), ਪਿੰਜੌਰ, ਪੰਚਕੂਲਾ (ਗੁਰਦੁਆਰਾ ਮੰਜੀ ਸਾਹਿਬ, ਧਾਰਾ ਮੰਡਲ ਪਿੰਜੌਰ, ਕੁਦਰਤੀ ਬਾਵਲੀ, ਭੀਮਾ ਦੇਵੀ ਮੰਦਰ ਸਥਾਨ ਅਜਾਇਬ ਘਰ ਅਤੇ ਯਾਦਵਿੰਦਰਾ ਗਾਰਡਨ), ਮੋਰਨੀ ਹਿਲਜ਼ (ਇਤਿਹਾਸਕ ਮੋਰਨੀ ਕਿਲ੍ਹੇ ਦੀ ਵਿਸ਼ੇਸ਼ ਫੇਰੀ), ਕੁਰੂਕਸ਼ੇਤਰ (ਜੋਤੀਸਰ ਤੀਰਥ ਸਥਾਨ ਅਤੇ ਸਰੋਵਰ, ਵਿਰਾਟ ਸਰੂਪ ਅਤੇ ਮਹਾਭਾਰਤ ਅਨੁਭਵ ਕੇਂਦਰ ਅਜਾਇਬ ਘਰ) ਅਤੇ ਬੱਲਭਗੜ੍ਹ (ਰਾਜਾ ਨਾਹਰ ਸਿੰਘ ਮਹਿਲ ਤੋਂ ਰਾਣੀ ਦੀ ਛੱਤਰੀ ਤੱਕ) ਵਿੱਚ ਵੀ ਕੀਤਾ ਗਿਆ।

ਰੇਵਾੜੀ ਵਿਖੇ ਆਯੋਜਿਤ ਪ੍ਰੋਗਰਾਮ ਵਿੱਚ ਵਿਧਾਇਕ ਸ੍ਰੀ ਲਛਮਣ ਸਿੰਘ ਯਾਦਵ ਨੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ।

ਇਸ ਆਯੋਜਨ ਵਿੱਚ ਵਿਦਿਆਰਥੀਆਂ, ਸਥਾਨਕ ਨਿਵਾਸੀਆਂ, ਸੈਲਾਨੀਆਂ, ਵਿਰਾਸਤ ਪ੍ਰੇਮੀਆਂ ਅਤੇ ਕੁਦਰਤ ਪ੍ਰੇਮੀਆਂ ਨੇ ਉਤਸ਼ਾਹ ਨਾਲ ਹਿੱਸਾ ਲਿਆ। ਭਾਗੀਦਾਰਾਂ ਨੇ ਵੱਖ-ਵੱਖ ਇਤਿਹਾਸਕ ਸਥਾਨਾਂ ਦਾ ਦੌਰਾ ਕੀਤਾ, ਸਥਾਨਕ ਪਰੰਪਰਾਵਾਂ ਨੂੰ ਜਾਣਿਆ ਅਤੇ ਹਰਿਆਣਾ ਦੀ ਸੱਭਿਆਚਾਰਕ ਵਿਰਾਸਤ ਪ੍ਰਤੀ ਆਪਣੀ ਸਮਝ ਅਤੇ ਪ੍ਰਸ਼ੰਸਾ ਨੂੰ ਹੋਰ ਡੂੰਘਾ ਕੀਤਾ।

ਹੈਰੀਟੇਜ ਐਂਡ ਸਿਟੀ ਵਾਕ 2026 ਰਾਹੀਂ ਹਰਿਆਣਾ ਸੈਰ-ਸਪਾਟਾ ਨੇ ਵਿਰਾਸਤ ਦੀ ਸੰਭਾਲ, ਸੱਭਿਆਚਾਰਕ ਪ੍ਰਫੁੱਲਤਾ ਅਤੇ ਟਿਕਾਊ ਸੈਰ-ਸਪਾਟੇ ਨੂੰ ਉਤਸ਼ਾਹਿਤ ਕਰਨ ਦੀ ਆਪਣੀ ਵਚਨਬੱਧਤਾ ਨੂੰ ਮੁੜ ਮਜ਼ਬੂਤ ਕੀਤਾ ਹੈ। ਇਹ ਪਹਿਲਕਦਮੀ ਆਧੁਨਿਕ ਪੀੜ੍ਹੀ ਅਤੇ ਸੂਬੇ ਦੀ ਅਣਮੁੱਲੀ ਵਿਰਾਸਤ ਵਿਚਕਾਰ ਇੱਕ ਮਜ਼ਬੂਤ ਸਬੰਧ ਸਥਾਪਤ ਕਰਨ ਦਾ ਇੱਕ ਮਹੱਤਵਪੂਰਨ ਮਾਧਿਅਮ ਸਾਬਤ ਹੋਈ।

ਬੁਲਾਰੇ ਨੇ ਇਸ ਸਫਲ ਆਯੋਜਨ ਵਿੱਚ ਸਹਿਯੋਗ ਦੇਣ ਵਾਲੇ ਸਾਰੇ ਭਾਗੀਦਾਰਾਂ, ਸਥਾਨਕ ਪ੍ਰਸ਼ਾਸਨ, ਵਿਰਾਸਤ ਮਾਹਿਰਾਂ ਅਤੇ ਹੋਰ ਹਿੱਸੇਦਾਰਾਂ ਦਾ ਤਹਿ ਦਿਲੋਂ ਧੰਨਵਾਦ ਪ੍ਰਗਟ ਕੀਤਾ, ਜਿਨ੍ਹਾਂ ਦੇ ਸਹਿਯੋਗ ਨਾਲ ਇਹ ਸਾਰਥਕ ਪਹਿਲਕਦਮੀ ਸਫਲਤਾਪੂਰਵਕ ਸੰਪੱਨ ਹੋਈ।

ਜ਼ਿਕਰਯੋਗ ਹੈ ਕਿ ਨਿਗਮ ਵੱਲੋਂ ਪਹਿਲੀ ਵਾਰ 27 ਸਤੰਬਰ 2024 ਨੂੰ ਵਿਸ਼ਵ ਸੈਰ-ਸਪਾਟਾ ਦਿਵਸ ਦੇ ਮੌਕੇ ’ਤੇ ਹੈਰੀਟੇਜ ਵਾਕ ਦਾ ਆਯੋਜਨ ਕੀਤਾ ਗਿਆ ਸੀ, ਜਿਸ ਨੂੰ ਲੋਕਾਂ ਦਾ ਭਰਵਾਂ ਹੁੰਗਾਰਾ ਮਿਲਿਆ ਸੀ। ਇਸੇ ਸਫਲਤਾ ਨੂੰ ਦੇਖਦੇ ਹੋਏ ਹੁਣ ਦੂਜੀ ‘ਹੈਰੀਟੇਜ ਐਂਡ ਸਿਟੀ ਵਾਕ’ ਆਯੋਜਿਤ ਕੀਤੀ ਗਈ।

ਸਲਸਵਿਹ/ 2026

 

*****

 

(Release ID: 2223)