ਚੰਡੀਗੜ੍ਹ, 12 ਸਤੰਬਰ - ਹਰਿਆਣਾ ਦੇ ਜਨ ਸਿਹਤ ਇੰਜੀਨੀਅਰਿੰਗ ਵਿਭਾਗ ਦੇ ਕੰਮਕਾਜ ਵਿੱਚ ਹੁਣ ਤਕਨਾਲੋਜੀ ਦੇ ਜ਼ਰੀਏ ਨਿਗਰਾਨੀ ਹੋਰ ਮਜ਼ਬੂਤ ਹੋਵੇਗੀ। ਜਨ ਸਿਹਤ ਇੰਜੀਨੀਅਰਿੰਗ ਮੰਤਰੀ ਸ਼੍ਰੀ ਰਣਬੀਰ ਗੰਗਵਾ ਨੇ ਵਿਭਾਗ ਵਿੱਚ ਹੋਣ ਵਾਲੇ ਮੇਨਟੇਨੈਂਸ ਅਤੇ ਕੈਪੀਟਲ ਵਰਕ ਸਮੇਤ ਜਲ ਸਪਲਾਈ, ਸੀਵਰੇਜ ਅਤੇ ਹੋਰ ਕਾਰਜਾਂ ਦਾ ਡਿਜੀਟਲ ਰਿਕਾਰਡ ਤਿਆਰ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਇਸ ਤਹਿਤ ਕਿਸੇ ਵੀ ਕੰਮ ਨੂੰ ਸ਼ੁਰੂ ਕਰਨ ਤੋਂ ਲੈ ਕੇ ਪੂਰਾ ਹੋਣ ਤੱਕ ਉਸਦੀ ਤਸਵੀਰ ਅਤੇ ਵੀਡੀਓ ਮੌਕੇ ਤੋਂ ਰਿਕਾਰਡ ਕੀਤੀ ਜਾਵੇਗੀ ਅਤੇ ਜਿਓ-ਟੈਗਿੰਗ ਦੇ ਜ਼ਰੀਏ ਉਸਦੀ ਲੋਕੇਸ਼ਨ ਵੀ ਦਰਜ ਹੋਵੇਗੀ।

ਮੰਤਰੀ ਸ਼੍ਰੀ ਗੰਗਵਾ ਨੇ ਖਾਸ ਤੌਰ 'ਤੇ ਨਿਰਦੇਸ਼ ਦਿੱਤੇ ਹਨ ਕਿ ਕੰਮ ਸ਼ੁਰੂ ਹੋਣ ਤੋਂ ਪਹਿਲਾਂ, ਕਾਰਜ ਦੌਰਾਨ ਅਤੇ ਪੂਰਾ ਹੋਣ ਤੋਂ ਬਾਅਦ ਦੀ ਫੋਟੋ-ਵੀਡੀਓਗ੍ਰਾਫੀ ਕਰਵਾਈ ਜਾਵੇ ਅਤੇ ਇਹ ਰਿਕਾਰਡ ਸਬੰਧਤ ਬਿੱਲ ਦੇ ਨਾਲ ਉਪਲਬਧ ਹੋਵੇ। ਯਾਨੀ ਕਿਸੇ ਕੰਮ ਦੇ ਭੁਗਤਾਨ ਦੀ ਪ੍ਰਕਿਰਿਆ ਵਿੱਚ ਉਸਦੇ ਮੌਕੇ 'ਤੇ ਹੋਏ ਨਿਪਟਾਰੇ ਦਾ ਡਿਜੀਟਲ ਰਿਕਾਰਡ ਵੀ ਨਾਲ ਰਹੇਗਾ। ਇਸ ਨਾਲ ਕੰਮ ਦੀ ਪ੍ਰਗਤੀ ਅਤੇ ਵਾਸਤਵਿਕ ਸਥਿਤੀ ਨੂੰ ਜਾਂਚਣਾ ਆਸਾਨ ਹੋਵੇਗਾ।

ਮੰਤਰੀ ਨੇ ਹਰੇਕ ਵਿਭਾਗੀ ਕਾਰਜ ਅਤੇ ਸੰਪਤੀ ਨੂੰ ਯੂਨੀਕ ਐਸੇਟ ਆਈ.ਡੀ. ਦੇਣ ਦੇ ਨਿਰਦੇਸ਼ ਵੀ ਦਿੱਤੇ ਹਨ। ਇਸ ਆਈ.ਡੀ. ਦਾ ਵਰਨਣ ਬਿੱਲ ਵਿੱਚ ਕੀਤਾ ਜਾਵੇਗਾ। ਕਾਰਜਾਂ ਨਾਲ ਸਬੰਧਤ ਫੋਟੋ, ਵੀਡੀਓ ਅਤੇ ਦੂਜੇ ਡਿਜੀਟਲ ਰਿਕਾਰਡ ਨੂੰ ਮੁੱਖ ਦਫਤਰ ਪੱਧਰ 'ਤੇ ਸੁਰੱਖਿਅਤ ਰੱਖਣ ਲਈ ਆਈ.ਟੀ. ਸੈੱਲ ਵਿਵਸਥਾ ਵਿਕਸਿਤ ਕਰੇਗਾ। ਭਵਿੱਖ ਵਿੱਚ ਕਿਸੇ ਕਾਰਜ ਬਾਰੇ ਜਾਣਕਾਰੀ ਜਾਂ ਸਤਿਆਪਨ ਦੀ ਲੋੜ ਪੈਣ 'ਤੇ ਉਸਦਾ ਰਿਕਾਰਡ ਉਪਲਬਧ ਰਹੇਗਾ।

ਮੰਤਰੀ ਸ਼੍ਰੀ ਰਣਬੀਰ ਗੰਗਵਾ ਨੇ ਕਿਹਾ ਕਿ ਸਰਕਾਰੀ ਕੰਮਾਂ ਵਿੱਚ ਤਕਨਾਲੋਜੀ ਦੀ ਵਰਤੋਂ ਵਧਣ ਨਾਲ ਨਿਗਰਾਨੀ ਵਿਵਸਥਾ ਹੋਰ ਬਿਹਤਰ ਹੋਵੇਗੀ। ਉਨ੍ਹਾਂ ਜਿੱਥੇ ਸੰਭਵ ਹੋਵੇ ਇਲੈਕਟ੍ਰੋਨਿਕ ਮੇਜ਼ਰਮੈਂਟ ਬੁੱਕ (ਈ-ਐਮ.ਬੀ.) ਅਪਨਾਉਣ ਅਤੇ ਠੇਕੇਦਾਰਾਂ ਦੇ ਬਿੱਲ ਆਨਲਾਈਨ ਜਮ੍ਹਾਂ ਕਰਵਾ ਕੇ ਉਨ੍ਹਾਂ ਦੀ ਡਿਜੀਟਲ ਜਾਂਚ ਦੀ ਵਿਵਸਥਾ ਵਿਕਸਿਤ ਕਰਨ ਦੇ ਨਿਰਦੇਸ਼ ਦਿੱਤੇ। ਕਾਰਜਾਂ ਦੀ ਮੌਕੇ 'ਤੇ ਪ੍ਰਗਤੀ ਦਾ ਸਤਿਆਪਨ ਵੀ ਸਬੰਧਤ ਫੀਲਡ ਅਧਿਕਾਰੀਆਂ ਦੁਆਰਾ ਕੀਤਾ ਜਾਵੇਗਾ।

ਖਰੀਦ ਜਾਂ ਕਾਰਜ ਨੂੰ ਮਨਜ਼ੂਰੀ ਦੇਣ ਤੋਂ ਪਹਿਲਾਂ ਜੌਬ ਕਾਰਡ ਨੂੰ ਮੁੱਖ ਦਫਤਰ ਦੁਆਰਾ ਵਿਕਸਿਤ ਕੀਤੇ ਜਾਣ ਵਾਲੇ ਆਨਲਾਈਨ ਸਿਸਟਮ 'ਤੇ ਅਪਲੋਡ ਕੀਤਾ ਜਾਵੇਗਾ। ਮੇਨਟੇਨੈਂਸ ਕਾਰਜਾਂ ਲਈ ਪਹਿਲਾਂ ਤੋਂ ਐਗਰੀਮੈਂਟ ਕਰਨ ਅਤੇ ਪ੍ਰੋਵਾਈਡਿੰਗ ਐਂਡ ਫਿਕਸਿੰਗ ਦੇ ਮਾਮਲਿਆਂ ਵਿੱਚ ਖਰੀਦੀ ਗਈ ਸਮੱਗਰੀ ਨੂੰ ਪਹਿਲਾਂ ਐਮ.ਏ.ਐਸ. ਰਜਿਸਟਰ ਵਿੱਚ ਦਰਜ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਸਮੱਗਰੀ ਦੀ ਖਪਤ ਵੀ ਇਸੇ ਰਜਿਸਟਰ ਦੇ ਮਾਧਿਅਮ ਨਾਲ ਦਰਜ ਹੋਵੇਗੀ।

ਕਾਰਜ ਪ੍ਰਕਿਰਿਆ ਨੂੰ ਹੋਰ ਪਾਰਦਰਸ਼ੀ ਬਣਾਉਣ ਲਈ ਆਨਲਾਈਨ ਕੋਟੇਸ਼ਨ ਮੰਗਵਾਉਣ, ਐਸ.ਡੀ.ਈ. ਅਤੇ ਜੇ.ਈ. ਦੀ ਮੌਜੂਦਗੀ ਜਾਂ ਨਜ਼ਦੀਕੀ ਨਿਗਰਾਨੀ ਵਿੱਚ ਕਾਰਜ ਕਰਵਾਉਣ ਅਤੇ ਬਿੱਲਾਂ ਦੀ ਜਾਂਚ ਦੌਰਾਨ ਕਾਰਜ ਦੀ ਵਾਸਤਵਿਕ ਪ੍ਰਗਤੀ ਦਾ ਮਿਲਾਨ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

ਮੁੱਖ ਦਫਤਰ ਪੱਧਰ 'ਤੇ ਡਿਜੀਟਲ ਡੈਸ਼ਬੋਰਡ ਵਿਕਸਿਤ ਹੋਵੇਗਾ:

ਸ਼੍ਰੀ ਗੰਗਵਾ ਨੇ ਕਾਰਜਾਂ ਦੀ ਨਿਗਰਾਨੀ ਲਈ ਮੁੱਖ ਦਫਤਰ ਪੱਧਰ 'ਤੇ ਡਿਜੀਟਲ ਡੈਸ਼ਬੋਰਡ ਵਿਕਸਿਤ ਕਰਨ ਲਈ ਵੀ ਕਿਹਾ ਹੈ। ਇਸ ਵਿੱਚ ਕਾਰਜ ਦੀ ਪ੍ਰਗਤੀ, ਖਰਚ, ਫੋਟੋ, ਸੰਪਤੀਆਂ ਅਤੇ ਉਨ੍ਹਾਂ ਦੀ ਸਥਿਤੀ ਦਾ ਰਿਕਾਰਡ ਇੱਕ ਜਗ੍ਹਾ ਉਪਲਬਧ ਹੋ ਸਕੇਗਾ। ਪੀ.ਐਫ.ਐਮ.ਐਸ., ਜੀ.ਆਈ.ਐਸ. ਅਤੇ ਹੋਰ ਸਰਕਾਰੀ ਡਿਜੀਟਲ ਪਲੇਟਫਾਰਮਾਂ ਨਾਲ ਇਸਨੂੰ ਜੋੜਨ ਦੀਆਂ ਸੰਭਾਵਨਾਵਾਂ ਵੀ ਤਲਾਸ਼ੀਆਂ ਜਾਣਗੀਆਂ।

ਪਾਰਦਰਸ਼ਤਾ ਵਧੇਗੀ, ਜਵਾਬਦੇਹੀ ਵੀ ਤੈਅ ਹੋਵੇਗੀ:

ਮੰਤਰੀ ਸ਼੍ਰੀ ਰਣਬੀਰ ਗੰਗਵਾ ਨੇ ਕਿਹਾ ਕਿ ਇਹਨਾਂ ਵਿਵਸਥਾਵਾਂ ਦਾ ਉਦੇਸ਼ ਵਿਭਾਗ ਦੇ ਕੰਮਕਾਜ ਵਿੱਚ ਪਾਰਦਰਸ਼ਤਾ ਵਧਾਉਣ, ਕਾਰਜਾਂ ਦੀ ਗੁਣਵੱਤਾ ਦੀ ਨਿਗਰਾਨੀ ਮਜ਼ਬੂਤ ਕਰਨ ਅਤੇ ਸਰਕਾਰੀ ਧਨ ਦੀ ਬਿਹਤਰ ਵਰਤੋਂ ਯਕੀਨੀ ਬਣਾਉਣ ਦਾ ਹੈ। ਡਿਜੀਟਲ ਰਿਕਾਰਡ ਨਾਲ ਕੰਮ ਦੀ ਪ੍ਰਗਤੀ ਦਾ ਸਪੱਸ਼ਟ ਵੇਰਵਾ ਉਪਲਬਧ ਰਹੇਗਾ ਅਤੇ ਲੋੜ ਪੈਣ 'ਤੇ ਸਬੰਧਤ ਕਾਰਜ ਦਾ ਸਤਿਆਪਨ ਵੀ ਆਸਾਨੀ ਨਾਲ ਕੀਤਾ ਜਾ ਸਕੇਗਾ।

ਉਨ੍ਹਾਂ ਵਿਭਾਗ ਨੂੰ ਇਹਨਾਂ ਸਾਰੇ ਬਿੰਦੂਆਂ ਦੇ ਆਧਾਰ 'ਤੇ ਲੋੜੀਂਦੀ ਐਸ.ਓ.ਪੀ. ਤਿਆਰ ਕਰਕੇ ਲਾਗੂ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਨਾਲ ਹੀ, ਨਿਯਮਾਂ ਦੀ ਅਣਦੇਖੀ ਜਾਂ ਵਿੱਤੀ ਅਨਿਯਮਿਤਤਾ ਸਾਹਮਣੇ ਆਉਣ 'ਤੇ ਸਬੰਧਤ ਅਧਿਕਾਰੀ-ਕਰਮਚਾਰੀ ਦੀ ਜ਼ਿੰਮੇਵਾਰੀ ਤੈਅ ਕਰਨ ਲਈ ਕਿਹਾ ਹੈ।

ਸਲਸਵਿਹ/2026

*****